Tsuvtsemeaaltere – gåessie maahtam byjjes pensjovnem vaeltedh?

Tsuvtsemeaaltere lea pensjovneaaltere mij lea sjïehtedamme man guhkiem mijjieh veanhtadibie gaskemedtien jielebe – juktie ij mijjen pensjovne unnede gosse guhkebem jielebe. Dïhte ij leah noerhkeme, men aalterem baajnehte gåessie aarehkommes maahtah baalhka- jïh premijepensjovnem vaeltedh, jïh gåessie maahtah reaktam åadtjodh garantijepensjovnem jïh årrojelissiehtimmiem utnedh.

Naemhtie tsuvtsemeaaltere datnem baajnehte

Dïhte baajnehte gåessie datne aarehkommes maahtah baalhka- jïh premijepensjovnem vaeltedh – baalhka- jïh premijepensjovnem maahtah aarehkommes vaeltedh golme jaepiej åvtelen dov tsuvtsemeaaltere. Gååvnesieh naan sjïere tsiehkieh båeries njoelkedassi mietie.
Tsuvtsemeaaltere maadthvaarjelimmiem tsåvtsa – maahtah aarehkommes garantijepensjovnem, baalhkapensjovnelissiem, årromelissiem jïh voeresefassemedåarjoem åadtjodh dov tsuvtsemeaalteren raejeste.
Dam medtiejieledegåhkoen mietie sjïehtede tïjjen mietie – jis medtiejieledegåhkoe guhkede dellie tsuvtsemeaaltere jienede. Dan gaavhtan prognovsh dorje fïerhten jaepien dutnjien gie ij leah ennje nænnoestamme tsuvtsemeaalterem åådtjeme.

Mannasinie tsuvtsemeaaltere gååvnese?

Gosse medtiejieledegåhkoe guhkede tjuara seamma pensjovne jienebi jaepiej mietie ryöhkoe, dellie askeåasa unnede. Tsuvtsemeaaltere båata destie eah pensjovnh unnedh gosse guhkebe jielebe.

Gåessie maahtah dov byjjese pensjovnem vaeltedh?

Dov reakasovvemejaepie nænnoste gåessie maahtah aelkedh byjjes pensjovnem vaeltedh.

Baalhkapensjovne jïh premijepensjovne maahtah aarehkommes vaeltedh golme jaepiej åvtelen dov tsuvtsemeaaltere. Gååvnesieh naan sjïere tsiehkieh båeries njoelkedassi mietie.
Garantijepensjovnem, baalhkapensjovnelissiem, årromelissiem jïh voeresefassemedåarjoem maahtah aarehkommes åadtjodh dov tsuvtsemeaalteren raejeste.
Ij tsuvtsemeaaltere dïenesjepensjovnem baajnehth. Gåessie maahtah dam vaeltedh maahtah dov dïenesjepensjovnelatjkosne gaavnedh.

Dov tsuvtsemeaaltere jis reakasovvih: 1958-1964
Reakasovvih	Tsuvtseme-aaltere	Maahtah baalhka- jïh premijepensjovnem vaeltedh	Aarehkommes reakta maadthvaarjelæmman*
1958	66 jaepieh	61 jaepien raejeste	66 jaepien raejeste
1959	66 jaepieh	62 jaepien raejeste	66 jaepien raejeste
1960	67 jaepieh	62 jaepien raejeste	67 jaepien raejeste
1961- 1962	67 jaepieh	63 jaepien raejeste	67 jaepien raejeste
1963- 1964	67 jaepieh	64 jaepien raejeste	67 jaepien raejeste

* Garantijepensjovnem, baalhkapensjovnelissiem, årromelissiem jïh voeresefassemedåarjoem.

Skïemtje- jïh barkohtsmaaksoem maaksa dennie asken raejesne åvtelen dov tsuvtsemeaalterem jaksh.

Dov tsuvtsemeaalteren prognovse – jis jaepien 1965 jallh dan minngesne reakasovveme

Jis jaepien 1965 jallh dan minngesne reakasovvih dellie ij leah ennje dov tsuvtsemeaaltere nænnoestamme. Fïerhten jaepien orre prognovsh darjoeh mah vuesiehtieh guktie tsuvtsemeaalterem maahta jeatjahtovvedh.

Tabellen dan vuelelen vuajnah mij tsuvtsemeaaltere dov reakasovvemejaepien mietie daelie. Mujhtieh dah sifferh maehtieh jeatjahtovvedh åvtelen dov tsuvtsemeaalterem nænnoste.

Dov tsuvtsemeaalteren prognovse jis 1965-2014 reakasovvih
Reakasovvih	Tsuvtsemeaalteren prognovse	Maahtah baalhka- jïh premijepensjovnem vaeltedh	Aarehkommes reakta maadthvaarjelæmman*
1965- 1966	67 jaepieh	64 jaepien raejeste	67 jaepien raejeste
1967- 1969	68 jaepieh	64 jaepien raejeste	68 jaepien raejeste
1970- 1980	68 jaepieh	65 jaepien raejeste	68 jaepien raejeste
1981- 1983	69 jaepieh	65 jaepien raejeste	69 jaepien raejeste
1984- 1996	69 jaepieh	66 jaepien raejeste	69 jaepien raejeste
1997- 1999	70 jaepieh	66 jaepien raejeste	70 jaepien raejeste
2000- 2014	70 jaepieh	67 jaepien raejeste	70 jaepien raejeste

* Garantijepensjovnem, baalhkapensjovnelissiem, årromelissiem jïh voeresefassemedåarjoem.

Skïemtje- jïh barkohtsmaaksoem maaksa dennie asken raejesne åvtelen dov tsuvtsemeaalterem jaksh.

Gåessie tsuvtsemeaalterem nænnoste – jïh man daamtaj maahta dam jeatjahtehtedh?

Tsuvtsemeaalterem nænnoste govhte jaepiej åvtelen dïhte faamosne. Dutnjien buerie astoem vedtedh dov pensjovnem soejkesjidh. Tsuvtsemeaalterem maahta jeenjemes akten jaepien jeatjahtehtedh fïerhten aejkien, mohte ajve jis ij leah jeatjahtovveme dej minngemes golme jaepiej mietie.