Ylheinen pansuuni perustuu kaikhiin sinun sisäletulhoin elämän läpi. Joka vuosi ko sie olet töissä ja maksat veroja sie tienaat sinun ylkheisheen pansuuhniin. Sie saat kansa ekstra rahhaa sisälepantuksi sinun ylheisheen pansuuhniin sinun lapsen neljän ensimäisen elovuositten kautta, riippumatta kunka pitkhään sie olet ollu vanheempainleetissä. Vaikka sie olet vanheempainleetissä, opiskelet oppirahotuksella, olet sotaväessä (peruskoulutus sotaväessä), sulla oon siukka-elikkä aktiviteettikorvaus elikkä sie saat työttömyyskorvauksen niin sie saat kompensasuunia sinun pansuuhniin valtiolta.
Kaikhiin enniimälle pansuuni tullee korkeamaksi mitä enämpi sie tienaat ja mitä hiljemin sie valikoittet mennä pansuunille. Tilikehitys Ruottissa ja net preemiepansuunifontit jokka sie olet valikoinu vaikuttavat kansa sinun pansuuhniin.
Sinun ylheinen pansuuni joka tullee valtiolta atministreerathaan ja maksethaan ulos Pansuunivirastolta. Ylheinen pansuuni oon monessa eri osassa – sisäletulopansuuni, preemiepansuuni ja karantiipansuuni.
Sulle joka olet syntyny 1938-1953 välisennä aikana lisäpansuuni saattaa kansa kuulua ylheisheen pansuuhniin. Jos sie olet syntyny 1937 elikkä varemin sinun ylheinen pansuuni oon lisäpansuunista ja maholisesta karantiipansuunista. Ylheistä pansuunia maksethaan ulos niin pitkhään ko sitä ellää.
Jos sulla oon matala pansuuni niin asuntolisä ja vanheempainelatustuki saattavat kansa kuulua ylheisheen pansuuhniin.
Jos likhiinen omhainen kuolee sie saatat saaja jälkiläispansuunin joka oon ekonoominen tuki sille sisäletulohäviölle jotako se merkittee sulle jälkiläisenä.
Pansuunisysteemin eri osat
Sisäletulopansuuni
Joka vuosi tallehtithaan 16 prosenttiä sinun pansuuninperustavasta sisäletulosta ja muista verotettavista korvauksista sisäletulopansuuhniin.
Pansuuninperustettu sisäletulo saattaa koostua useaman sorttisista sisäletuloista. Paitti tilistä pansuuninperustettu sisäletulo saattaa koostua esimerkiksi sisäletulosta elinkeinotoiminasta (omayrittäjä), vanheempainrahasta, työttömyyskorvauksesta ja siukka- elikkä aktiviteettikorvauksesta.
Preemiepansuuni
Joka vuosi tallehtithaan 2,5 prosenttia sinun pansuuninperustavasta sisäletulosta ja muista verotettavista korvauksista preemiepansuuhniin. Sie valikoittet itte jos sie halvaat panna rahat fontivalikoihmaan elikkä jos sie annat rahat olla jäljelä valtiolisessa etuvaalissa AP7 Såfa.
Karantiipansuuni
Jos sulla oon ollu pieni elikkä ei yhthään sisäletuloa elämän aikana sulla saattaa olla oikeus karantiipansuuhniin. Se oon perussuoja joka perustuu olletikki siittä kunka suuri sinun sisäletulopansuuni oon ja kunka pitkhään sie olet asunu Ruottissa, mutta kansa sinun siviliasenosta.
Asuntolisä ja vanheempainelatustuki
Sulla jollako oon matala pansuuni, sie saatat hakea asuntolissää. Lisä riippuu sinun sisäletuloista, maholisista varoista ja sinun asuntokostanuksesta. Sie saatat hakea asuntolissää riippumatta jos sie asut hyyrätyssä asunossa, asunto-oikeuksessa, omassa talossa, vanhuustenasumisessa elikkä muussa asumisessa.
Vanheempainelatustuki vakkuuttaa ette sie, jollako oon matala pansuuni elikkä ei pansuunia ollenkhaan, kuitenki saat kohtuulisen elämistason jos muut pansuunieut ei riitä. Sie häyt ensinä ottaa ulos net muut pansuunieut jotako sulla oon oikeus saaja ennen ko met saatama päättää jos sulla oon oikeus saaja vanheempainelatustukea.
Asuntolisä ja vanheempainelatustuki (sivu oon ruottiksi)
Jos sie siiryt Ruottista
Jos sie lopetat töistä, alat töihiin muussa maassa elikkä siiryt Ruottista sulla oon jäljelä se pansuuni jonka sie olet tienanu sisäle täälä niinku sisäletulopansuunina, lisäpansuunina ja preemiepansuunina, mutta karantiipansuunile ja asuntolisäle jällaavat eri säänöt.
Jälkiläispansuuni – ekonoominen tuki ko joku oon kuolu
Jos likhiinen omhainen kuolee niin sie jälkiläisenä saatat saaja jälkiläispansuunin. Se oon ekonoominen tuki joka kuuluu ylheisheen pansuuhniin. Sulla saattaa oon oikeus saaja jälkiläispansuunin jos sinun mies/vaimo kuolee, elikkä jos sie lapsena menetät yhen elikkä molemat vanhuukset. Tuki oon sen takia ette vastata yhestä osasta siittä elatuksesta jotako se joka kuoli tuotti.
Ekonoominen tuki ko omhainen kuolee
Virkapansuuni sinun työnantajalta
Usseimat saavat kansa virkapansuunin heän työnantajalta. Jos sulla oon ollu useampia eri työnantajia sulla saattaa olla virkapansuuni eri virkapansuunipuulaakilta.
Oma säästäminen pansuuhniin
Sie saatat kansa säästää privatisti sinun pansuuhniin pankossa elikkä vakkuutuspuulaakin kautta jos sie halvaat. Esimerkkiä pitkänaijan pansuuninsäästämisestä oon ette panna syrhjään rahhaa investeerinkisäästökonthuun (ISK) elikkä säästää rahhaa kapitaalivakkuutuksheen. Yks muu keino ette säästää tulevaisuuele oon ette amurteerata asumislainoja.