Jos sie olet syntyny 1959 elikkä jälemin sie saatat varhaimiten ottaa ulos pansuunin siltä kuukauelta lähtien ko sie täytät 62 vuotta. Jos sie olet syntyny 1958 elikkä ennen sie saatat varhaimiten ottaa ulos pansuunin siltä kuukauelta ko sie täytät 61 vuotta. Sie saatat olla töissä yhtä aikaa ko sie otat ulos sinun ylheisen pansuunin. Sulla oon oikeus olla töissä 67 vuotheen saakka, mutta jos sie ja sinun työnantaja oletta yksmielisiä niin sie saatat jatkaa työntekoa vielä pitemphään. Vuelta 2020 sulla oon oikeus olla jäljelä töissä 68 vuotheen saakka.
Mitä hiljemin sie menet pansuunille sitä korkeaman pansuunin sie saatat saaja. Se johtuu siittä ette sie kerkiät tienata sisäle enämpi rahhaa ja ette sie uskottavasti olet pansunääri lyhemän aijan.
Ko sie tehet hakemuksen niin sie päätät jos sie halvaat ottaa ulos koko sinun pansunin, elikkä osan siittä, per kuukausi. Sie päätät kansa jos sie halvaat saaja sinun preemiepansuunin yhtä aikaa ko lopun ylheisen pansuunin.
Tehe hakemus kolme kuukautta ennen ko sie alat ottamhaan ulos sen. Jos sie olet asunu ulkomaila sie piät hakea kuus kuukautta ennen. Ko sie olet jättäny sisäle hakemuksen niin sie saat meiltä päätöksen suunile 20 päivä kuukautta ennen sinun ensimäistä ulosmaksokuukautta.
Pansuunivirasto maksaa ulos sinun ylheisen pansuunin kerran kuukauessa. Jos sulla oon jälkiläispansuuni, asuntolisä elikkä vanheempainelatustuki nämät eut maksethaan yhyä aikaa.
Muista ette vissit ruottalaiset virkapansuunit maksethaan auttomaattisesti ko sie täytät 65 vuotta, toisia häätyy itte hakea. Ota yhtheyttä sinun virkapansuuninpuulaakin kansa ette kuula mikä jällaa sulle.
Hae ylheistä pansuunia ko sie asut muussa maassa
Jos sie olet ollu töissä ja maksanu veroja Ruothiin niin sie olet tienanu sisäle ruottalaisheen pansuuhniin. Sulla oon oikeus saaja sen vaikka sie asut muussa maassa pansunäärinä.
Jos sie asut ulkopuolela Ruottia EU elikkä EES- maassa (EES oon EU-maat ja Norja, Iislanti ja Liechtenstein) niin sie piät hakea pansuunivirastolta siinä maassa missä sie asut. Sie piät hakea ruottalaista pansuunia vähhiinthääns kuus kuukautta ennen sinun ensimäistä kuukausiulosmaksoa.