Ei se ole varma ette sie saat pittää koko sinun pansuunin, riippuen siittä mikkä osat pansuunista sulla on ja missä maassa sie asut. Sie häyt joka vuosi lähättää meile elämisentoistuksen ette saa pittää sinun pansuunin.
Palkkaperustetun pansuunin sie saat riippumatta mihinkä sie siiryt
Sinun palkkapansuuni, preemiepansuuni ja lisäpansuuni sie saat pittää riippumatta mihinkä maahan sie siiryt.
Garantiipansuuni kun sie siiryt
Vuesta 2023 sulla ei ole oikeus saa garantiipansuunia kun sie asut EU/EES alueessa ja Schweizissä. Jos sie asut eli siiryt muuhun maahan EU/EES:n ja Schweizin ulkopuolela sillon sulla ei ole oikeus saa garantiipansuunia.
Jos sulla on garantiipansuuni sopeuttumispansuunhiin eli leskipansuunhiin sillon jällaavat samat säänöt kun garantiipansuunila ylheisheen pansuunhiin.
Palkkapansuuninlisäys kun sie siiryt
Palkkapansuuninlisäys maksethaan ulos lisänä ylheisheen pansuunhiin. Sie saatat saa palkkapansuuninlisäyksen jos sie asut eli siiryt muuhun EES-maahan eli Schweitzhiin (EES on EU-maat sekä Norja, Islandi ja Liechtensteini) eli maahan millä Ruottila on sopimus sosiaalisesta turvasta.
Asuntolisäys ja vanheemanelatustuki jos sie siiryt ulkomaile
Jos sie oleskelet EU/EES-maassa eli Schweizissä, mutta on jäljelä sinun asunto Ruottissa ja itte maksat sinun asunon kostanukset, sillon sie saatat saa asuntolisäystä, jos sie suunittelet olla poiessa Ruottista korkeinthaan vuen. Vuen jälkhiin sinua ei ennää pietä ette sie asut Ruottissa.
EU/EES-alueen ulkopuolela asuntolisäystä saatethaan maksaa ulos korkeinthaan kuus kuukautta. Jos sie siiryt ulkomaile sinun oikeus asuntolisäyksheen loppuu siittä kuukauvesta jälkhiin kun sie siiryt.
Jos sie oleskelet muussa EU/EES-maassa eli Schweizissä, mutta sulla on jäljelä sinun asunto Ruottissa ja itte maksat sinun asunon kostanukset, sillon sie saatat saa vanheemanelatustuen, jos sie suunittelet olla poiessa Ruottista korkeinthaan yhen vuen. Vuen jälkhiin sinua ei ennää pietä ette sie asut Ruottissa.
EU/EES-alueen ulkopuolela vanheemanelatustuen saatethaan maksaa ulos korkeinthaan kolme kuukautta. Jos sie siiryt ulkomaile sinun oikeus vanheemanelatustukheen loppuu siittä kuukauvesta jälkhiin kun sie siiryt.
Muuttaa ulkomaan atressia
Sie häyt itte ilmottaa jos sie siiryt uutheen atreshiin ulkomaile. Se on tärkeä ette Pansuunivirastola on sinun nykyaikanen atressi. Sillon saatama lähättää sulle ulosmakso ilmotuksen ja elämisentoistuksen.
Vero sulle joka asut Ruottin ulkopuolela
Pansuuni palkkoja Ruottista on verotettavia. Jos sie asut muussa maassa ja on pansuuni Ruottista sie piät tavalisesti maksaa erikoisen ulkomaila asuvitten palkkaveron. Sie joka asut muussa maassa kun Ruotti häyt hakea Verovirastosta erikoista ulkomaila asuvitten palkkaveroa (SINK).
Hintaperusmäärä (prisbasbelopp) räknäthään sinun kuukausisummasta jälkhiin yhen hintaperusmäärän vähenyksen. Hintaperusmäärä vastaa sitä perusvähenystä mitä sie saatat saa jos sinua verotethaan preliminääri verola.
Sie maksat siis vain veroa siltä osalta pansuunista joka ylittää hintaperusmäärää. Vapasumman hallitus päättää joka vuosi. Pansuuni verotethaan vain siltä osalta joka kuukausi ylittää 1/12 osan 0,77 hintaperusmäärästä.
Vältä maksaa tuplaveroa
Ruottila on sopimus monen maan kans joka säänöstellee missä sie piät maksaa veroja sinun ruottalaisesta pansuunista. Se merkittee ette sie et tartte maksaa veroja sinun ruottalaisesta pansuunista sekä Ruottissa ette siinä maassa missä sie asut. Jos sulla on kysymyksiä pansuunin verovähenyksestä kun asuu Ruottin ulkopuolela sie saatat kontaktata Verovirastoa.
Elämisentoistus
Joka vuosi sie joka asut muussa maassa ja saat pansuunin Ruottista tarttet toistaa ette sie elät ette saa pansuunia jatkuvasti. Se jällaa jos sulla on ylheinen pansuuni eli jälkhiinjäänheenpansuuni Pansuunivirastosta sekä siukka- eli aktiviteettikorvaus eli työvahinkoelinräntty Vakkuutuskassasta.
Elämisentoistus lähätethään vuosittain kaikile joita ei mene identtifieerata elektroonisen vaihton kautta, joka tapahtuu vissitten maitten välissä.
Ruottila on elektrooninen vaihto niitten maitten kans missä assuu enniiten ulkomaanpansuunäriä.
Elämisentoistus sie häyt sitte saa hyväksytyks joltaki seuraavilta: ruottalainen ambasaati, ruottalainen konsylaatti, Ruottin kirkko, ulkomaan sosiaalivakkuutuslaitos, notarius publicus, ulkomaan puliisivirasto, ulkomaan rejisteriä pitävä väestörejisterivirasto. Jättää elämisentoistuksen (ruottiksi)
Jos sie olet Ruottissa sie saatat kans kääntyä yhteen palvelukontturhiin ette saa apua. Löytää sinun lähhiimän palvelukontturin
Sinun pansuunin ulosmakso muuhun maahan
Sie saatat valita saa sinun pansuunin ulosmaksetuks sinun ruottalaisheen pankkikonthuun eli sinun pankkikonthuun muussa maassa. Rahat lähätethään samana päivänä kun ulosmaksot ruottalaishiin konthuin, joka kuukausi päivinä 18 ja 19. Jos sulla on konttu muussa maassa kun Ruotti, räknää ette se mennee ulosmaksopäivästä kolme-viis pankkipäivää ennen kun rahat on kontussa.
Vasthaanottajakostanuksen otethaan ulos vasthaanottajapankilta ennen kun rahat panthaan sinun konthuun. Jos sinun toivottu valyytta ei toimi met Pansuunivirastossa tulema päättämhään valytasta. Jos sie valittet ruottalaisia kruunuja se on tärkeä ette kuulla sinun pankin kans ette het saattavat ottaa vasthaan ruottalaisia kruunuja.
Ulkomaan koskevia kysymyksiä
Jos sulla on muita kysymyksiä sie saatat ottaa yhteyttä meihin
Telefooni: +46 498-200 700
E-posti: international@pensionsmyndigheten.se