Sie se itte päätät missä iässä sie haluat alkaa othaan ulos koko eli osia sinun pansuunista. Sillä aikakauvela mitä sie päätät alottaa sinun ulosottoja on suuri merkitys kuinka suuri sinun pansuuni tullee olheen.
Pansuunin eri osia koostuu valtion ylheisestä pansuunista, useasti työnantajan virkapansuunista ja maholisesta omasta säästämisestä. Sie saatat tarttea itte hakea ette saa kaikki sinun pansuunin osat.
Ylheinen pansuuni maksethaan ulos niin kauan kun sitä ellää. Virkapansuunin ja oman säästämisen ulosmakso tapahtuu rajotetula aikakautena.
Ennen kun sie haet ylheistä pansuunia.
Päätä koska sie haluat mennä pansuunhiin. Sie saatat varhaiten ottaa ulos ylheisen pansuunin 62 vuen iästä (63 vuotta jällaa vuesta 2023).
Sulla on oikeus olla töissä siihen asti ette sie olet täyttäny 68 (69 vuotta jällaa vuesta 2023). Vississä taphauksissa sie saatat olla töissä pitemphään, jos sie ja sinun työnantaja tehettä sopimuksen siittä.
Hae suunile kolme kuukautta ennen kun sie haluat saa sinun ensi ulosmakson. Jos sie olet ollu töissä eli asunu ulkomaila sie piät hakea kuus kuukautta ennen kun sie haluat saa sinun pansuunin.
Räknää sinun pansuunia. Sinun vero muuttuu ja tullee matalamaks tammikuusta asti sinä vuona kun sie täytät 66 (67 vuotta jällaa vuesta 2023), riippuen kuinka suuri pansuuni ja/eli työpalkka sulla on.
Päätä jos sie haluat ottaa ulos koko pansuunin eli osia siittä. Sie saatat jatkaa olla töissä ja samala ottaa ulos pansuunia.
Sen jälemin sie otat ulos sinun pansuunin, sen korkeaman pansuunin sie saat. Se riippuu siittä ette pansuunia maksethaan ulos vähemin vuosia. Työnjakto antaa kans sulle korkeaman pansuunin. Kun elämän pittuuven keski-ikä nousee sie, joka olet nuorempi, häyt räknätä ette olla töissä jonku vuen lissää ette saa pansunnin joka vastaa aiempia vuosiluokkia.
Jos sie saat matalan palkkaperustetun pansuunin sie saatat saa garantiipansuunin.
Sie et tartte erikoisesti hakea garantiipansuunia, koska se tapahtuu auttomaattisesti kun sie haet pansuunia. Sie saatat saa garantiipansuunin vasta kun sie olet täyttäny 65 vuotta (66 vuotta jällaa vuesta 2023). Garantiipansuuni
Ota selvile jos sie tarttet itte hakea virkapansuunia
Suuriimala osala on virkapansuuni omalta työnantajalta. Vissit virkapansuunit maksethaan ulos auttomaattisesti kun sie täytät 65 vuotta, muut sie häyt hakea.
Virkapansuunia mennee usseimiten ottaa ulos koko elämän eli lyhemän aijan, esimerkiks 5, 10, 15 eli 20 vuen aikana. Sen on tärkeä aatella läpi kuinka sie päätät ottaa ulos sinun virkapansuunin koska sitä valintaa ei mene muuttaa jälemin. Ota yhteyttä sen pansuunibuulaakin kans, joka hoitaa sinun virkapansuunia ette saa tietoja mitä jällaa.
Jos sie asut Ruottin ulkopuolela
Jos sie olet ollu töissä Ruottissa, sulla on oikeus saa ruottalaisen ylheisen pansuunin ulosmaksetuks vaikka sie asut Ruottin ulkopuolela. Pansuuni kun sie asut Ruottin ulkopuolela
Ulosmaksosuunittelija
Ulosmaksosuunittelija on minPension.se sivula, yks väline joka auttaa sinua suunittelheen kuinka sie otat ulos sinun pansuunit. Sie saat yleiskuvan koko sinun pansuunista, ja saat selvile mikä summa tullee olheen joka kuukausi veron jälkhiin. Ulosmaksosuunittelija on ensi käessä sulle joka aattelet ette ottaa ulos osan eli koko sinun pansuunin tulevan vuen aikana. Sie häyt olla täyttäny 54 vuotta, tienanu pansuunhiin Ruottissa ja sulla on ruottalainen e-lekitimasjuuni, ennen kun sie saatat käyttää palvelua.